yorğun - یورغون
yorulmuşam yorğunam
وئبلاق حاققیندا



بو وئبلاگ شخصی بیر وئبلاگ اولاراق ادبیات، تاریخ، سیاست و باشقا قونولاردا یازی‌لار یازیلاجاق.
باخیش‌لارینیزی و هابئله اؤنری‌لرینیزی بیزدن اسیرگه‌مه‌یین

یازی‌لاری یاخشی گؤرونوش ایله گؤرمك اوچون B Mitra فونتونو بورادان ائندیریب و بیلگی‌سایارینیزدا یئرلشدیرین
http://yorqun.arzublog.com/uploads/yorqun/BMITRA.rar

وئبلاق باشقانی : احمد قرباني
سورغو
توركجه يازيلان وئبلاقلاردا عرب الفابئتينده يازماق ياخشي دير يوخسا latin alfabetində؟






سه شنبه 12 دی 1391 :: یازار : احمد قرباني

من بو دیلده دانیشاجاغام


بیر بولبول اولوب ،زیروه‌لردن  دره‌لره ، دره‌لردن زیروه‌لره چیخاجاغام

بو كولدان   او  كولا 

بو  آغاجدان  او آغاجا

بو  تایدان  او  تایا

                         اوچاجاغام 

قانادلانیب  گؤیلرده  اوچاركن

چایلارین  آخارینی  گؤروب  كئچركن

بولاقلارین   سویونو   دادیب   ایچركن

بو اوبادان  او اوبایا ، بو ائیواندان  او  ائیوانا كؤچركن

گؤروب  گؤتوردوكلریمی  اوخشاییب  اوخویاجاغام

 

من  طبیعت  نغمه‌سی ایله  باریشاجاغام

من  طبیعت نغمه‌سی ایله  یاریشاجاغام

طبیعت نغمه‌سینه  اویاركن ، طبیعته  قاریشاجاغام

اینان آی دیلیم ، سنینله‌یم

من سنینله ، سن‌دن  سنه  دانیشاجاغام

من بو ابدیت ماهنی‌سینی ، سنده و سنینله اوخویاجاغام


من كؤرپه اوشاقلارین اینقیلتیسینی

كؤرپه قوُزولارین ملشمه‌سینی

كؤرپه قوشلارین جوكگولتوسونو

و داها باشقا باشقا  كؤرپه‌لرین  آغلاییب  گولمه‌سینی

سنده ائشیدیب ،

اونلاری سنین الینله اوره‌ییمین  یارالارینا  درمان  ائدیب ، اوره‌ییمی  ساغلایاجاغام

كؤنلومون  جوشان  چاغلاریندا

اورك ائویمین آلیشان  چاغلاریندا

سنی آیدین  سولار كیمی  اورك  دنیزیمه  دولدوروب ، اودلاریمی  سوندوره‌جه‌یم

 

سنده چوخلاری چوخ  دانیشدی

سنینله  چوخلاری  ابدییّته  قاریشدی

"بابك"ین گؤوده‌سی دوغرانینجا ، اوره‌یی داغلانینجا

"نسیمی"‌نین  دریسی سویولونجا

"آلی‌"نین گؤزلری اویولونجا

ستارین گولله یئری سویویونجا، ابدی اوُیونجا

چوخلاری دوغولونجا ، چوخلاری قوووُلوُنجا ، چوخلاری ایسه بوغوُلونجا

سنینله  سنده دانیشدیلار

دیلیم! 

سنینله سنده  دوغولانلار، دوغولدولار

سنینله ، سنده ، سنین اوچون  بوغولانلار  ایسه،  بوغولمادیلار   دیلیم !

بالاجا  قارا  بالیق  كیمی ابدیت گؤلونده  اوزمه‌یه  باشلادیلار  دیلیم!

حیدربابا كیمی گؤیلری یئرلری توتوب ، داغلاردان داشلاردان  باج  آلدیلار دیلیم!


سنین  بولبول‌لرین  اؤلمز

سنین گوللرین   سولماز

اونلار  سنسیز  قالمازلار

سن  عومورلوك‌سن  سه ،

سنینله ، سنده  قونوشانلار  اؤلمز ،  دیلیم ‼

سن اؤلمزسن

سن یئرلی  یوردلو  اولدوغونا   گؤره  اؤلمزسن

سن اؤزگورسن  ، باغیمسیزسان

اؤزگورلر  اؤلمزلر دیلیم ‼


ابدیت  ایسته‌ین‌لر سنی  گزیرلر ، سنی  آختاریرلار

ایسته‌مه‌ین‌لر  ایسه ، اؤزگه دیلینده بانلاییرلار
ایسته‌ین‌لر  ابدی  اولاراق  عومور  سورورلر
ایسته‌مه‌ین‌لر  ایسه  ، قوُدوُروُبان  هورورلر ، هوردوكجه چورویورلر

ابدیت قوشلاری سنی اونودمازلار

من ایسه بو قوشلارا قوشولوب  ، سنینله قوشا قاریاجاغام

سنی دانمایاجاغام ، دانیشاجاغام

بیر قوش كیمی  بوداقلارینا  قوناركن  قونوشاجاغام ، دیلیم ‼



(Əhmad Qurbani-Yorğun – 1391/10/7(2012/12/27





یازی بؤلومو : منیم شعرلریم، 
:
ایلگیلی باغلانتی‌لار :


باشقا یارپاق‌لار
سایغاج
  • بوتون گؤروش‌لر :
  • بو گونون گؤروشو :
  • دونه‌نین گؤروشو :
  • بو آیین گؤروشو :
  • کئچن آیین گؤروشو:
  • باخیش‌لار :
  • یازی‌لارین سایی :
  • سون گؤروش :
  • یئنی‌له‌مه چاغی :